HAMAS Trampning tahdidlariga javob qaytardi

HAMAS AQSh prezidenti Donald Trampning tahdidlariga e’tibor bermay, Isroil asirlarini ozod qilish borasida faqat kelishilgan shartlarga amal qilishini ma’lum qildi. Tramp harakatni «do‘zax yaratish» bilan qo‘rqitgan edi, agar shanbagacha qolgan isroillik asirlar ozod qilinmasa.

«Tramp shuni yodda tutishi kerakki, mavjud kelishuv bor va unga ikkala tomon ham rioya qilishi kerak. Asirlarni qaytarishning yagona yo‘li shu», — dedi HAMAS vakili Sami Abu Zuhri seshanba kuni.

💬 «Tahdidlar hech qanday natija bermaydi, balki vaziyatni yanada murakkablashtiradi», — deya qo‘shimcha qildi u.

HAMAS shanba kuni rejalashtirilgan uch isroillik asirni ozod qilishni kechiktirish bilan tahdid qilib, Isroilni sulh shartlarini buzishda aybladi. Jumladan, Isroilning vayron bo‘lgan G‘azo sektoriga tinch aholi uchun chodir va boshpana kiritishga ruxsat bermayotgani ta’kidlandi.

19 yanvardan beri tomonlar besh marta mahbus almashish jarayonini o‘tkazdi. Natijada 21 isroillik asir va 730 dan ortiq falastinlik mahbus ozod qilindi.

Sulhning birinchi bosqichi mart oyining boshigacha davom etadi. Bu bosqich doirasida HAMAS 33 nafar asirni, Isroil esa deyarli 2000 falastinlik mahbusni ozod qilishi lozim.

Agar tomonlar kelishuvning murakkabroq bo‘lgan ikkinchi bosqichi bo‘yicha yangi bitimga erisha olmasa, mart oyidan boshlab harbiy harakatlar qayta boshlanishi mumkin. Ikkinchi bosqich barcha qolgan asirlarni ozod qilish va sulhni muddatsiz uzaytirishni ko‘zda tutadi.

Eslatib o‘tamiz, Xalqaro jinoiy sud (XJS) 2024 yil noyabr oyida Isroil bosh vaziri Binyamin Netanyaxu va sobiq mudofaa vaziri Yoav Galantga qarshi G‘azo sektorida urush jinoyatlari va insoniyatga qarshi jinoyatlar sodir etgani uchun hibsga olish orderi chiqargan edi.

Hozirgacha davom etayotgan harbiy harakatlar natijasida 48 000 dan ortiq falastinlik halok bo‘lgan.