Grenlandiya AQSh tarkibiga kirishni istamaydi — bosh vazir

Grenlandiya bosh vaziri Yens-Frederik Nilsen avtonom hudud AQSh tarkibiga kirish o‘rniga Daniya bilan qolishni afzal ko‘rishini bildirdi. Uning aytishicha, Donald Trampning Grenlandiyani «baribir qo‘lga kiritish» haqidagi bayonotlari fonida bu pozisiya yanada aniq namoyon bo‘lmoqda.

«Agar hozir AQSh va Daniya o‘rtasida tanlov qilishga to‘g‘ri kelsa, biz Daniyani tanlaymiz. Grenlandiya AQShga tegishni, AQSh tomonidan boshqarilishni yoki AQShning bir qismi bo‘lishni istamaydi», — dedi Nilsen Kopengagendagi matbuot anjumanida.

Daniya bosh vaziri Mette Frederiksen esa ittifoqchi davlat tomonidan ko‘rsatilayotgan bosimni «butunlay qabul qilib bo‘lmaydigan» deb baholab, oldinda yanada murakkab davr turganini ta’kidladi.