Germaniya ham 16 yoshgacha bo‘lgan bolalar uchun ijtimoiy tarmoqlarni taqiqlaydimi?

Germaniyada aholining ko‘pchiligi 16 yoshgacha bo‘lgan bolalar uchun ijtimoiy tarmoqlarni taqiqlashni qo‘llab-quvvatlamoqda.

Germaniyada Avstraliya tajribasi asosida 16 yoshgacha bo‘lgan bola va o‘smirlar uchun ijtimoiy tarmoqlardan foydalanishni taqiqlash g‘oyasini qo‘llab-quvvatlovchilar soni ortib bormoqda. INSA instituti tomonidan BILD nashri uchun o‘tkazilgan so‘rov natijalariga ko‘ra, respondentlarning 60 foizi bunday taqiq tarafdori. Qarshi bo‘lganlar — 24 foiz, yana 16 foiz esa befarq ekanini yoki javob berishga qiynalganini aytgan.

Tashabbus ayniqsa «Yashillar» partiyasi tarafdorlari orasida katta qo‘llab-quvvatlovga ega — 71 foiz. XDS/XSS tarafdorlarining 70 foizi, SDPG saylovchilarining esa 69 foizi taqiqni ma’qullagan. AdG va SvDP elektorati orasida qo‘llab-quvvatlash nisbatan pastroq bo‘lib, har ikkisida ham 57 foiz «tarafdor» deb javob bergan.

Yosh bo‘yicha ham sezilarli farq mavjud: 30 yoshdan katta aholi orasida taqiqni qat’iy ko‘pchilik qo‘llab-quvvatlamoqda. 30 yoshgacha bo‘lgan yoshlar orasida esa fikrlar deyarli teng: 40 foiz — «tarafdor», 37 foiz — «qarshi».

«16 yoshgacha bo‘lgan bolalar uchun ijtimoiy tarmoqlarni taqiqlashni qo‘llab-quvvatlayotganlar aholining ko‘pchiligini tashkil etmoqda, hatto yoshlar orasida hozircha bu qadar qo‘llab-quvvatlov bo‘lmasa ham», — dedi INSA rahbari Germann Binkert BILD nashriga bergan izohida.

Avstraliya esa bu yo‘ldan allaqachon bordi: joriy haftadan boshlab u yerda 16 yoshgacha bo‘lgan bola va o‘smirlarga TikTok, Instagram, Facebook, YouTube, Snapchat, X va boshqa platformalarda akkaunt ochish taqiqlangan. Kompaniyalar foydalanuvchilar yoshini tekshirishi va voyaga yetmaganlarning mavjud akkauntlarini o‘chirib tashlashi shart. Qoidalar buzilgan taqdirda 50 million Avstraliya dollarigacha jarima solinishi mumkin.