Garovdagi qidiruv e’lon qilingan Cobalt topildi

Garov- bir shaxsning boshqa shaxsga mol-mulkni yoki unga bo‘lgan huquqni majburiyatlarni ta’minlash uchun berishi hisoblanadi.

Ma’lumki, Bank kreditlari ko‘pchilik hollarda garov evaziga beriladi. Agar kredit olgan shaxs bank oldidagi majburiyatlarini bajarmagan taqdirda sud tomonidan kredit qarzdorliklarini garovdagi mulkiga qaratish yoki xatlash to‘g‘risida ijro varaqa chiqariladi.

Jumladan, Fuqarolik ishlari bo‘yicha Jizzax tumanlararo sudining 16.08.2021 yildagi «Halqbank»AT Do‘stlik filiali foydasiga I.Xaitbayevning kredit qarzi undiruvini garov mulki hisoblangan «Cobalt LT» rusumli avtomashinasiga qaratish to‘g‘risidagi ijro varaqasi byuroning Jizzax shahar bo‘limiga 09.11.2021 yilda kelib tushgan.
Davlat ijrochisi tomonidan qarzdorga ijro ishi qo‘zg‘atilib, taraflarga nusxalari yuborilgan.

Mazkur ijro ishi doirasida I.Xaitbayev bir necha bor ogohlantirilishiga qaramasdan qarzdorlikni to‘lashdan bosh tortib, o‘ziga tegishli bo‘lgan avtomashinani xatlashdan yashirib kelgan. Keyingi ijro harakatlarida qarzdorga ma’muriy jarima qo‘llanilib, ushbu avtomashinaga nisbatan qidiruv e’lon qilingan.

O‘tkazilgan tezkor qidiruv tadbirlarida mazkur «Cobalt LT» rusumli avtomashinasi Jizzax shahri «SH.Rashidov» ko‘chasidagi ikkilamchi avtomobillar savdosi bilan shug‘ullanuvchi avtopavilyonda davlat raqamisiz sotuvda turganligi aniqlanib, jarima maydonchasiga joylashtirildi.

Fuqaro olgan krediti muntazam to‘lab borganida, ma’muriy jarima, davlat boji, ijro yig‘imi kabi ortiqcha to‘lovlar to‘lamagan hamda avtomashinasi jarima maydonchasiga joylashtirilmagan bo‘lar edi.