Fransiyada hukumat iste’foga chiqishi mumkin

Fransiya yana bir siyosiy inqiroz yoqasida turibdi. Bugun bosh vazir Fransua Bayru parlamentda hukumatga ishonch masalasini muhokamaga qo‘yish niyatida. Tahlilchilar fikricha, mag‘lubiyat ehtimoli yuqori — va agar shunday bo‘lsa, hali o‘n oydan buyon ishlab kelayotgan hukumat iste’foga chiqishiga to‘g‘ri keladi.

Bu qarorga asos bo‘lgan omil — davlat qarzini kamaytirish maqsadida 44 milliard yevro davlat xarajatlarini qisqartirish va ikkita bayramni bekor qilish rejasi. Ammo Bayru rahbarlik qilayotgan markazchi-o‘ngchi blokning parlamentda ko‘pchiligi yo‘q, shu bois mazkur chora-tadbirlar parlamentda ham, jamiyatda ham qarshilikka uchragan.

Agar Bayru mag‘lub bo‘lsa, keyingi qarorni prezident Emmanuel Makron qabul qiladi: u yoki yangi bosh vazir tayinlaydi, yoki parlamentni tarqatadi. Siyosatshunoslar birinchi variantni ehtimolliroq deb hisoblashmoqda. Ommaviy norozilik namoyishlari xavfiga qaramay, Makronning muddatidan oldin iste’fosi (2027 yilgacha) amalda istisno qilingan.

Fransiyadagi siyosiy beqarorlik Germaniyada ham xavotir uyg‘otmoqda. Mutaxassislar ogohlantirishicha, agar Parij davlat qarzi muammosini hal qila olmasa, bu yevro qursiga va Fransiya-Germaniya hamkorligidagi loyihalarga, xususan mudofaa sohasida, salbiy ta’sir ko‘rsatishi mumkin.

«So‘nggi bir yarim yil ichida Fransiya va Germaniya o‘rtasidagi hamkorlikda jiddiy ilgarilash kuzatilmadi. Bu har ikki mamlakatda bo‘lib o‘tgan yangi saylovlar fonida yuz berdi. Ammo bu hamkorlik Yevropaning kelajagi uchun muhim», — dedi BILD nashriga bergan intervyusida siyosatshunos Dominik Grillmayer.