Fransiya Ukrainaga 500 kmgacha masofaga ucha oladigan bir nechta dronlarini sovg‘a qildi

Fransiyaning EOS Technologie kompaniyasi Ukrainaga 500 km gacha masofaga ucha oladigan bir nechta Rodeur 330 hujum dronlarini sovg‘a qildi.

Bu haqda France 24 xabar berdi.

EOS Technologie prezidenti Jan-Mark Zuliani G‘arb ishlab chiqaruvchilari uchun dronlarni Ukrainaga topshirish dronlarni dala sharoitida sinab ko‘rish uchun noyob imkoniyat ekanligini ta’kidladi.

Ta’kidlanishicha, razvedka missiyalarini ham, kamikaze hujumlarini ham bajarishga qodir bo‘lgan ushbu model Yevropada ko‘proq "qalqon" sifatida, Ukrainada esa "qilich" sifatida ishlatilishi mumkin.

Rodeur 330 - bu Fransiyaning EOS Technologie kompaniyasining hujum dronidir. Dron katapulta yordamida uchiriladi va besh soatgacha havoda qolishi mumkin.

Dronning yuk ko‘tarish qobiliyati 4 kg va parvoz masofasi 500 km gacha, qanotlari esa 3,3 m. Rodeur soatiga 120 km tezlikda va 5000 m gacha maksimal balandlikda harakatlanadi.