Falastin Turkiyada Netanyahuni hibsga olish buyrug‘ini “adolat g‘alabasi” deb atadi

Falastin barcha davlatlarni Turkiyadan ibrat olishga va Isroil urush jinoyatchilariga nisbatan huquqiy hamda sud mexanizmlarini ishga solishga chaqirdi.

Falastin Tashqi ishlar vazirligi bayonotida, Turkiyada Isroil rasmiylarini hibsga olish “adolatni ta’minlash yo‘lidagi to‘g‘ri qadam” ekani ta’kidlandi.

Bayonotda shunday deyiladi:
“Bu jasur huquqiy qadam — adolat tamoyillarini hamda ayrim davlatlarning Isroilga nisbatan jazosiz qolish siyosatini rad etgan erkin yetakchilar va xalqlar irodasining ifodasidir.”

Bayonot mualliflarining ta’kidlashicha, bu holat “harbiy jinoyatlar va insoniyatga qarshi jinoyatlarga qarshi kurashda universal yurisdiksiyani tasdiqlaydi”, shu bilan birga “Turkiya sud tizimining bu harakati yuksak huquqiy va ma’naviy pozisiyani namoyon etadi hamda Falastin xalqiga qarshi jinoyat sodir etganlar, ularning maqomidan qat’i nazar, javobgarlikdan qochib qutula olmasligini ko‘rsatadi”.

Falastin qonun ustuvorligi va inson huquqlariga ishongan barcha davlatlarni Turkiya tajribasidan o‘rnak olishga, Isroil urush jinoyatchilariga nisbatan adolatni qaror toptirish uchun huquqiy va sud mexanizmlaridan foydalanishga hamda davom etayotgan genosid va Falastin xalqiga qarshi hujumlar qurbonlariga hamdard bo‘lishga chaqirdi.

Istanbul bosh prokuraturasi talabiga ko‘ra, Istanbul navbatchi sudyasi 37 nafar gumonlanuvchini, jumladan Isroil bosh vaziri Binyamin Netanyahuni, G‘azodagi tizimli harakatlari va Sumud global flotiga qarshi amalga oshirgan harakatlari uchun “insoniyatga qarshi jinoyatlar” va “genosid” ayblovlari bilan hibsga olish bo‘yicha order chiqardi.