Evroittifoq Tramp bilan savdo urushida bojlarni oshirishga tayyor

Shuningdek, AQShning yirik texnologik kompaniyalari hamda banklariga javob choralarini tayyorlamoqda, deya xabar bermoqda Politico.

Avvalroq Bryussel Vashingtonning bojlariga o‘zaro boj tariflari bilan javob bergan edi. Ammo endi Yevroittifoq yanada qat’iy harakat qilishga tayyor, chunki Oq uy texnologik qoidalar kabi notarif to‘siqlar bilan tahdid qilmoqda.

"Biz bu muzokaralarga kuchli pozisiyadan yondashamiz. Yevropaning ko‘plab imkoniyatlari bor – savdodan texnologiyagacha va bozorimiz hajmigacha. Bu, shuningdek, bizning qat’iy qarshi choralarni qabul qilishga tayyorligimizga ham asoslanadi. Barcha vositalarni muhokama qilyapmiz", — deya munosabat bildirdi Yevrokomissiya rahbari Ursula fon der Lyayen Yevroparlamentda.

Politico'ning yozishicha, Yevroittifoq AQShga nisbatan avtomobillar, farmasevtika mahsulotlari va oziq-ovqat mahsulotlari bo‘yicha sof eksportchi, biroq xizmatlar bo‘yicha sof importchi hisoblanadi, bu esa unga savdo nizolarida ko‘proq ta’sir o‘tkazish vositalarini beradi.

Xususan, Yevropa Ittifoqi Qo‘shma Shtatlarning texnologik kompaniyalari faoliyatini yanada qattiqroq tartibga solishi, yirik Amerika banklariga soliq solishi yoki Yevropada biznes yuritish uchun lisenziya berish jarayonini sekinlashtirishi mumkin.

Bryussel bunday choralarning JP Morgan yoki Bank of America kabi AQShning yirik banklariga yoki Ilon Maskning X ijtimoiy tarmog‘i, Google qidiruv giganti yoki Amazon internet-savdo platformasiga qaratilishi mumkinligi variantini ko‘rib chiqmoqda. Shu bilan birga, joriy haftada Apple va Meta Yevropaning raqamli bozorlar to‘g‘risidagi qonunlarini buzgan-buzmaganiga to‘g‘risida qaror qabul qilinishi kutilmoqda.

"Agar Tramp ma’muriyati bojlar joriy etsa, biz mutlaqo yangi o‘yinga kirishamiz", — dedi Yevroittifoq diplomati.

Eslatib o‘tamiz, Qo‘shma Shtatlar prezidenti Donald Tramp barcha mamlakatlarga nisbatan boj joriy qilishni va’da qilgan edi.