Everestni chiqindilardan tozalashda dronlardan foydalanilmoqda

Everestda dronlar bir oy ichida sayyohlar qoldirib ketgan 280 kilogramm chiqindini yig‘ishdi.

Everestda chiqindi yig‘ish mahalliy aholi tomonidan amalga oshiriladi, ular baland tog‘li lagerlardan o‘nlab kilogramm chiqindilarni tayanch lagerga olib o‘tishga majbur. Odamlar bunga taxminan to‘rt soat sarflashadi, dronlar esa buni olti daqiqada bajaradi.

Nepalda Everestdagi chiqindilarni tozalash uchun dronlardan foydalanish boshlandi, deb xabar beradi Bloomberg. Aprel oyining o‘rtalaridan may oyining o‘rtalariga qadar dronlar 280 kilogrammdan ortiq chiqindilarni yig‘ib, qayta ishlashga jo‘natishgan.

Odatda, mahalliy aholi – sherpalar – dunyodagi eng baland cho‘qqini tozalash uchun mas’uldirlar. Ularning har biri muzliklar va yoriqlar bo‘ylab to‘rt soatlik yo‘lni bosib o‘tib, taxminan 20 kilogramm chiqindi tashiydi. Oxirgi toqqa chiqish mavsumida ularga SZ DJI Technology Co. kompaniyasining ikkita yirik droni yordam berdi, ular bir xil marshrutni 6 daqiqada bosib o‘tishga qodir.

Bloomberg ta’kidlaganidek, dronlar to‘plangan chiqindi tufayli “dunyodagi eng baland chiqindixona” deb ataladigan qiyaliklarni tozalash bo‘yicha keng ko‘lamli dasturning bir qismiga aylandi. Nepal hukumati baza lageri tepasiga ko‘tarilgan alpinistlardan o‘zlari bilan kishi boshiga kamida 8 kilogramm chiqindi olib ketishni talab qildi. Aks holda, ular 4000 dollarlik garovdan mahrum bo‘ladi, deb xabar beradi rbc.ru.