Eronda mamlakatning 11 ta asosiy transport yo‘lagi bo‘ylab amalga oshirilayotgan yo‘l qurilishi loyihalarining qariyb 70 foizi joylashgan. Hozirda mamlakatda 164 dan ortiq avtomobil yo‘llari va magistrallar qurilishi loyihasi olib borilmoqda. Bu haqda Eron transport infratuzilmasini qurish va rivojlantirish kompaniyasi rahbari o‘rinbosari Alirizo Siyohpur ma’lum qildi.

Uning so‘zlariga ko‘ra, loyihalar bo‘yicha pudratchilar bilan tuzilgan shartnomalarning umumiy qiymati qariyb 25 trillion tomonni tashkil etadi. Kompaniya bevosita amalga oshirayotgan loyihalarning o‘rtacha bajarilish darajasi 55 foizga, viloyatlarga topshirilgan loyihalarniki esa 49 foizga yetgan.

Siyohpurning ta’kidlashicha, Eronning keng qamrovli transport rejasida oltita shimol-janub va beshta sharq-g‘arb yo‘nalishidan iborat 11 ta asosiy avtomobil yo‘lagi ko‘zda tutilgan. Ushbu yo‘laklar mamlakatning asosiy hududlarini o‘zaro bog‘lash, portlar va quruqlikdagi chegaralarga chiqish imkoniyatlarini kengaytirishga qaratilgan.

Ayni paytda Eronda jami 5742 kilometrga yaqin yo‘l qurilmoqda. O‘tgan yili 1350 kilometrga yaqin yo‘l foydalanishga topshirilgan. Bu so‘nggi o‘n yildagi muhim ko‘rsatkichlardan biri bo‘lgan.

Joriy yilning birinchi yarmida esa moliyaviy resurslar cheklanganiga qaramay, 631 kilometrlik yo‘l loyihasi yakunlanib, foydalanishga berilgan. Ularning ayrimlari Chobahor — Saraxs hamda Shalamcha — Pasobandar yo‘nalishlarini o‘z ichiga olgan sohilbo‘yi va sharqiy transport yo‘laklarida joylashgan.

Siyohpur ma’lum qilishicha, joriy yilning birinchi yarmida sohilbo‘yi yo‘lagida ham taxminan 120 kilometr yo‘l foydalanishga topshirilgan.

Uning qayd etishicha, ayrim hududlardagi murakkab sharoitlar, havo hujumlari va qurilish maydonlarining harbiy ob’ektlarga yaqinligiga qaramay, pudratchilar ishlarni davom ettirgan.

Kompaniya vakili zarur mablag‘lar o‘z vaqtida ajratilsa, qurilish sur’atlarini saqlab qolish va o‘tgan yilgi natijadan ham yuqori ko‘rsatkichga erishish mumkinligini bildirdi.