Eron TIV rahbari AQSh va Isroilning energetika ob’ektlariga zarbalari jiddiy ekologik oqibatlarga olib kelganini bildirdi

Eron tashqi ishlar vaziri Abbos Arog‘chining ta’kidlashicha, AQSh va Isroilning Erondagi energetika ob’ektlariga bergan zarbalari jiddiy ekologik oqibatlarni keltirib chiqargan.

U atrof-muhit siyosiy bosim vositasiga aylanmasligi, shuningdek, qisqa muddatli iqtisodiy va harbiy manfaatlar qurboni bo‘lmasligi kerakligini ta’kidladi.

Eron Tashqi ishlar vazirligi ma’lumotiga ko‘ra, Arog‘chi Tehronda bo‘lib o‘tgan «Sukunatdagi harbiy jinoyat: ekosid» nomli xalqaro konferensiyada nutq so‘zlagan.

Vazirning fikricha, ekosid tushunchasi atrof-muhitga qarshi sodir etilgan harbiy jinoyatlar doirasidan kengroq bo‘lib, tabiatni yo‘q qilish sifatida ham talqin qilinishi mumkin.

Arog‘chi atrof-muhit insoniyatning umumiy merosi ekanini alohida ta’kidladi. Uning aytishicha, tabiat davlatlar o‘rtasidagi raqobat maydoniga, siyosiy bosim vositasiga yoki qisqa muddatli iqtisodiy va harbiy manfaatlar qurboniga aylanmasligi lozim.