Eron TIV: "Eron va AQSh vositachilar orqali yadroviy hujjat bo‘yicha muloqotni davom ettirmoqda, lekin "evrouchlik" katta xatoga yo‘l qo‘ydi"

Tehron va Vashington Eron yadro dasturi atrofidagi inqirozni hal qilish masalasida vositachilar orqali xabar almashishda davom etmoqda.

Bu haqda Islom Respublikasi Tashqi ishlar vazirligi rahbari Abbos Arag‘chi ma’lum qildi.

"AQSh bilan muloqot vositachilar orqali davom etmoqda. Amerikaliklar o‘zaro hurmat asosida muzokaralar olib borishga tayyor bo‘lgan kunga biz ham to‘liq tayyor bo‘lamiz. Huquqlarimiz va manfaatlarimizni hurmat qilish kerak", — dedi u.

Eron Tashqi ishlar vazirligi rahbari Tehron avvalgi shartlarda muzokara stoliga qaytmasligini qayd etdi; mavjud vaziyatni hisobga olgan holda yangi asosda kelishib olish kerak bo‘ladi.

Arag‘chining so‘zlariga ko‘ra, Yevropa davlatlari bilan BMT Xavfsizlik Kengashining Eronga qarshi sanksiyalarini tiklash tashabbusi bo‘yicha ham muzokaralar davom etmoqda. "Uchta Yevropa davlati (Buyuk Britaniya, Germaniya va Fransiya) katta xatoga yo‘l qo‘yib, snapback mexanizmiga murojaat qilishdi. Aslida hammasi murakkablashdi. Muzokaralar davom etmoqda, umid qilamanki, biz o‘zaro tushunishga erishamiz", - deya qo‘shimcha qildi u.