Eron telekanalida Trampga suiqasd bilan tahdid qilindi. Uning javobi: “Agar shunday bo‘lsa, butun mamlakat havoga uchadi!”

Jahon iqtisodiy forumida ishtirok etish uchun Davosga uchishidan biroz oldin AQSh prezidenti Donald Tramp, agar mulla rejimi va ularning tarafdorlari unga suiqasd qilishga urinsa, qanday choralar ko‘rishini ochiq aytdi.

«Ular bunday qilmagani ma’qul. Ammo men shunday topshiriq berganman: agar qachondir biror narsa sodir bo‘lsa, butun mamlakat havoga uchadi», — dedi Tramp NewsNation telekanaliga bergan intervyusida. Ushbu suhbat oldindan yozib olingan «Katie Pavlich Tonight» dasturida 23 yanvar kuni (mahalliy vaqt bilan) efirga uzatildi.

Shundan so‘ng Tramp o‘zidan avvalgi prezident Jo Baydenni Eron tahdidlariga yetarlicha qat’iy javob bermaganlikda aybladi va Tehronga yana bir bor ogohlantirish yo‘lladi:
«Men juda aniq ko‘rsatmalar berganman: agar nimadir sodir bo‘lsa, ular yer yuzidan yo‘q bo‘lib ketadi».

Trampning keskin bayonotlari o‘tgan hafta o‘rtasida Eron davlat telekanalida namoyish etilgan lavhadan keyin yangradi. Unda Donald Tramp 2024 yilda Pensilvaniya shtatidagi Batler shahrida bo‘lib o‘tgan saylovoldi tadbirida unga uyushtirilgan suiqasddan so‘ng Maxfiy xizmat agentlari qurshovida tasvirlangan. Ekranda esa tahdidli yozuv paydo bo‘lgan:
«Bu safar [o‘q] nishondan chetga chiqmaydi».

Bu holat so‘nggi kunlarda mamlakat ichida minglab namoyishchilarni qatl etgan Eron rejimi bilan AQSh prezidenti o‘rtasidagi navbatdagi keskinlashuv sifatida baholanmoqda. Bir necha kun avval Eronning oliy rahbari Oyatulloh Ali Xomanay Trampni «jinoyatchi» deb atab, Erondagi norozilik namoyishlarini uyushtirishda shaxsan uni ayblagan edi.

Bunga javoban Tramp keskin tanqid bilan chiqib, Politico jurnaliga bergan intervyusida bosh mullani «ruhiy jihatdan nosog‘lom odam» deb atadi.
«Eron uchun yangi rahbariyat izlash vaqti keldi», — deya qo‘shimcha qildi AQSh prezidenti.

So‘nggi haftalarda Tramp AQSh namoyishchilarga yordam berish maqsadida harbiy aralashuvga ham tayyor ekanini bir necha bor ta’kidlab kelmoqda. Eron Qurolli kuchlari vakili, general Abolfazl Shekarchi 20 yanvar kuni shunday dedi:
«Tramp shunga ishonch hosil qilsinki: agar tajovuz qo‘li yetakchimizga uzatilsa, biz nafaqat o‘sha qo‘lni kesib tashlaymiz, balki ularning butun dunyosini yoqib yuboramiz».