Eron: "Endi AQShdan takliflarga rasmiy javob kutyapmiz"

Eron Tehron tomonidan Pokiston vositachilari orqali Vashingtonga taqdim etilgan harbiy harakatlarni to‘liq to‘xtatish bo‘yicha yangi taklifning ba’zi tafsilotlarini oshkor qildi.

Tasnim axborot agentligining xabar berishicha, 14 banddan iborat reja tajovuz qilmaslik kafolatlarini, AQSh kuchlarini Eronga tutash hududlardan olib chiqishni, dengiz blokadasini bekor qilishni, muzlatilgan Eron aktivlarini ozod qilishni, kompensasiya to‘lovlarini, sanksiyalarni bekor qilishni, barcha jabhalarda, jumladan, Livanda urushni tugatishni, Hormuz bo‘g‘ozida yuk tashishni tartibga solishning yangi mexanizmini va boshqa qoidalarni o‘z ichiga oladi.

Nashrning ta’kidlashicha, Amerika tomoni tomonidan taqdim etilgan to‘qqiz banddan iborat taklif ikki oylik sulh tuzish talabini o‘z ichiga olgan. Tehron bunga javoban masalalar 30 kun ichida hal qilinishi kerakligini va sulhni uzaytirish o‘rniga "urushni tugatish"ga e’tibor qaratish kerakligini aytdi.

"Eron endi AQShdan takliflarga rasmiy javob kutmoqda", deb ta’kidlaydi Tasnim manbasi.

Avvalroq Eron tashqi ishlar vaziri o‘rinbosari Kazem G‘aribobodiy Tehronda xorijiy elchilar bilan uchrashuvda Eron mojaroni hal qilish bo‘yicha yangi rejani Pokiston orqali AQShga yetkazganini aytgan edi.

AQSh prezidenti Donald Tramp, o‘z navbatida, Truth Socialdagi postida Tehronning Vashington takliflariga javobini qabul qilishi ehtimoldan yiroq ekanligini ta’kidladi.