Erdo‘g‘an: Ukrainadagi mojaroni muloqot orqali hal qilishda natijaga erishishimiz kerak

Turkiya prezidenti Rajab Toyyib Erdo‘g‘an Ukrainadagi mojaroni tinch yo‘l bilan hal etish bo‘yicha yaqin vaqt ichida aniq natijalarga erishish zarurligini ta’kidladi.

Uning so‘zlariga ko‘ra, Turkiya Rossiya va Ukraina o‘rtasidagi urushni muloqot va diplomatik muzokaralar orqali yakunlashga qaratilgan sa’y-harakatlarni davom ettiradi.

«Yaqin kelajakda Rossiya—Ukraina urushiga muloqot orqali yechim topishda natijalarga erishishimiz kerak», — dedi Erdo‘g‘an.

Turkiya rahbari, shuningdek, Anqara mojaroning har ikki tomoni bilan muloqotni saqlab qolayotgani va ularning ishonchidan foydalangan holda Ukrainada tinchlik o‘rnatishga faol ko‘mak berishda davom etishini ta’kidladi.