Doneskni jangsiz topshirish rejasi — Ukraina uchun strategik halokat bo‘lishi mumkin

Juma kuni kechqurundan boshlab ommaviy axborot vositalarida 15 avgust kuni Alyaskada AQSh prezidenti Donald Tramp va Vladimir Putin muhokama qilmoqchi bo‘lgan «tinchlik rejasi» haqidagi tafsilotlar tarqala boshladi. Agar OAVdagi ma’lumotlar to‘g‘ri bo‘lsa, bu reja ukrainaliklarning xavotirlarini amalda tasdiqlaydi, deb hisoblaydi BILD nashrining harbiy sharhlovchisi Yulian Ryopke. Reja Rossiyaga Donesk va Lugansk viloyatlarini topshirish, evaziga esa Rossiyaning Zaporojye va Xerson viloyatlaridagi hujumlarini to‘xtatishni nazarda tutadi.

Bundesver universiteti siyosatshunoslik professori Karlo Masala Kiyev nima uchun hech qanday xavfsizlik kafolatlarisiz hududlar almashinuvi asosida tinchlikka rozi emasligini izohlaydi:

«[Oq otishni to‘xtatish] bo‘yicha takliflar, hozirgi ko‘rinishida, harbiy nuqtai nazardan faqat Rossiyaga foyda keltiradi».

Agar Ukraina Qurolli Kuchlari hech qanday jangsiz bir qism hududdan chiqib ketsa — bu Rossiya armiyasining Ukraina markaziga yaqinlashishiga yo‘l ochadi. Hech qanday xavfsizlik kafolatisiz «Rossiya har qanday paytda jang harakatlarini qayta boshlashi mumkin» — lekin bu safar ancha qulay strategik pozisiyadan, deydi Masala.

Harbiy tahlilchi Torsten Xaynrix ham shunga o‘xshash fikrda. U Rossiya va Ukraina o‘rtasidagi urushni o‘zining YouTube-kanalida bir necha vaqtdan beri tahlil qilib kelmoqda. BILD nashriga bergan intervyusida u shunday dedi:

Rossiya armiyasi «Donbassda muvaffaqiyat qozona olmayapti, chunki bu hududda zich qurilish va tog‘li yerlar juda ko‘p. Bu hududdan voz kechish — rossiyaliklarga ukrainaliklar tomonidan qurilgan yirik mudofaa inshootlarini topshirishdir, bu inshootlar rossiyaliklarni ancha vaqt to‘xtatib turdi. Bu bilan birga Ukraina sanoat va konlarga ega yirik shaharlardan ham voz kechgan bo‘lardi, bu esa mamlakatni yanada zaiflashtiradi».

Agar bunday kelishuv amalga oshsa, u holda:

«Juda zaiflashgan Ukraina kuchliroq Rossiyaga yuzma-yuz qolar edi, Rossiya esa Amerika diqqati tarqalishini kutgan holda navbatdagi qurolli mojaroga tayyorgarlik ko‘rayotgan bo‘ladi», — deya ta’kidladi Xaynrix.

Institute for the Study of War (ISW) tahliliy markazi ham bu xavotirlarni tasdiqlaydi:

«Donesk viloyatining qolgan qismidan voz kechish va uni tinchlik kelishuvi uchun topshirish, lekin uzil-kesil siyosiy hal etish shartisiz — Rossiya armiyasini juda qulay holatga qo‘yadi».

Sababi shundaki, rossiyaliklar bunday kelishuv orqali og‘ir va qonli jangdan qutulgan holda, keyinchalik bundan ham qulay shartlarda hujumlarni qayta boshlashi mumkin bo‘lardi.