Chexiyada prezidentni qo‘llab-quvvatlash maqsadida yana mitinglar bo‘lib o‘tdi — Deutsche Welle

Prezident Petr Pavel va o‘ng qanot, yevroskeptik bosh vazir Andrey Babish o‘rtasidagi mojaro keskinlashgani fonida Chexiyaning 400 dan ortiq aholi punktlarida odamlar ko‘chalarga chiqdi. Mamlakatning aholi soni bo‘yicha ikkinchi yirik shahri Brnodagi namoyishda 8 mingdan 10 minggacha kishi ishtirok etdi.

1 fevral kuni Pavelni qo‘llab-quvvatlash aksiyasi Pragada ham o‘tkazilgandi. Tashkilotchilar bahosiga ko‘ra, unda qariyb 90 ming kishi qatnashgan.

Pavel va Babish o‘rtasidagi mojaro prezidentning “Avtomobilchilar o‘zlari uchun” partiyasi faxriy raisi Filip Turekni atrof-muhit vaziri lavozimiga tayinlashdan bosh tortganidan so‘ng avj oldi. Pavel bu qarorini Turekning demokratik davlatda vazir lavozimiga nomuvofiq nomzod ekani bilan izohlagan.

Turekning tayinlanishi rad etilgach, Babish hukumatidagi tashqi ishlar vaziri Petr Masinka Pavelning yordamchisi bilan yozishmalarda “munosabatlarni butunlay uzish” bilan tahdid qilgan. Prezident yozishmalarning skrinshotlarini e’lon qilib, Masinkani bosim o‘tkazishga va shantaj qilishga urinishda aybladi.