Cheklovlar mavjud ammo istisnolar bor

Sanksiyalar va Moskva bilan siyosiy ziddiyatlarga qaramay, Germaniya Rossiyaga tibbiy mahsulotlar yetkazib berishni oshirmoqda. 2026 yilning birinchi yarmida Germaniyadan Rossiyaga protezlar eksporti o‘tgan yilning shu davriga nisbatan qariyb 19 foizga oshib, 112 million yevroga yetdi. Bu kamida 2020 yildan buyon birinchi yarim yillik uchun qayd etilgan eng yuqori ko‘rsatkichdir.

Shu bilan birga, mazkur davrda Germaniyaning Rossiyaga umumiy eksporti 2,9 foizga kamaygan. Protezlar yetkazib berish hajmining o‘sishiga Ukrainaga qarshi urush oqibatlari ham ta’sir ko‘rsatayotgani aytilmoqda. G‘arb baholariga ko‘ra, Rossiyaning bir milliondan ortiq harbiy xizmatchisi halok bo‘lgan yoki yaralangan.

Germaniyaning boshqa sohalardagi eksportida ham o‘sish kuzatilgan. Xususan, Rossiyaga farmasevtika mahsulotlari yetkazib berish hajmi taxminan 18 foizga oshib, 1,5 milliard yevroga yetgan. Qishloq xo‘jaligi texnikasi eksporti esa 61 million yevrodan 89 million yevroga ko‘tarilgan.

Evropa Ittifoqi sanksiyalarida gumanitar sabablarga ko‘ra ayrim tibbiy mahsulotlar va dori-darmonlar uchun istisnolar nazarda tutilgan. Shu bois iqtisodiyotning boshqa tarmoqlariga nisbatan cheklovlar mavjud bo‘lsa-da, tibbiy mahsulotlar yetkazib berish davom etmoqda.