Adliya vazirligi olis (chekka) va notarius lavozimiga talab past hududlarda davlat notarial idorasi notariusi lavozimiga talabgorlarni oliy malaka komissiyasi tomonidan suhbat asosida tayinlash tartibini belgilaydigan nizomni davlat ro‘yxatidan o‘tkazdi. Hujjat 2026 yil 1 apreldan kuchga kiradi.
Nizomga ko‘ra, suhbat prezidentning 2025 yil 9 sentyabrdagi PQ–280-son qarori bilan tasdiqlangan ro‘yxatga kiritilgan notarial okruglarda notarius lavozimi bo‘sh bo‘lgan yoki yangi lavozim ta’sis etilgan hollarda o‘tkaziladi.
Belgilanishicha, suhbat oliy malaka komissiyasi va uning ishchi organi tomonidan tashkil etiladi. Talabgorlarning hujjatlari esa dastlab hududiy komissiyalar tomonidan ko‘rib chiqiladi.
Ro‘yxatga kiritilgan notarial okruglarda suhbat o‘tkazilishi haqida “Inson va qonun” gazetasida hamda Adliya vazirligining rasmiy veb-saytida e’lon beriladi. Talabgor hujjatlari hududiy komissiya tomonidan 15 kun ichida ko‘rib chiqiladi. Agar hujjatlar belgilangan talablarga muvofiq deb topilsa, oliy malaka komissiyasiga taqdim etish haqida xulosa tasdiqlanib yuboriladi.
Suhbat jarayonida talabgorlarning savollarga to‘liq va aniq javob berishi, kasbiy yo‘nalish bo‘yicha tizimli bilimlarga ega ekani, bilimlardan mustaqil foydalanish ko‘nikmalari, shuningdek, ijtimoiy jarayon va muammolarni mustaqil tahlil qila olish qobiliyati asosida baholanishi belgilangan.
Qayd etilishicha, ro‘yxatdagi notarial okruglarda kamida 3 yil notariuslik faoliyatini amalga oshirgan shaxslar keyinchalik respublikaning istalgan boshqa hududida xususiy amaliyot bilan shug‘ullanuvchi notarius sifatida faoliyatini davom ettirishi mumkin bo‘ladi.
Mazkur nizom 2026 yil 1 apreldan amalga kirishi belgilangan.
Hatto YTHdan keyin ham Adam Qodirov medal olib kelmoqda
Grenlandiya tashqi ishlar vaziri yig‘lab yubordi
Ukraina Rossiyaning "Oreshnik" raketalari uchiriladigan raketa maydonchasiga zarba berdi
