Britaniyaning oxirgi harbiy vertolyot zavodi yopilish xavfi ostida

Bu haqda Financial Times (FT) nashri zavodga egalik qiluvchi Italiya mudofaa sanoati guruhi Leonardo bosh direktori Roberto Singolani so‘zlariga tayanib xabar bermoqda.

Angliyaning janubi-g‘arbiy qismidagi Yovil shahrida joylashgan zavodning kelajagi haqidagi bu ogohlantirish mudofaa sanoatida hukumat shartnomalari yo‘qligi sababli keng tarqalgan norozilik fonida paydo bo‘ldi.

"Biz Yovilni abadiy subsidiya qila olmaymiz. Biz Buyuk Britaniya hukumatidan 14 yil davomida hech qanday shartnoma olmadik", dedi Singolani.

Taxminan 3300 kishi ishlaydigan zavodning yopilishi shahar va butun mintaqaga katta zarar yetkazadi. Bu boshqa kompaniyalarning yana bir necha ming xodimlariga ham ta’sir qiladi.

Britaniya Mudofaa vazirligi Qirollik havo kuchlari tomonidan bir necha o‘n yillar davomida foydalanilgan Puma transport vertolyotlari o‘rniga yangi vertolyotlar xaridini bekor qilsa, bu qaror qabul qilinishi mumkin.