Boks. World Boxing kubogini ikki g‘alaba va bir mag‘lubiyat bilan boshladik

Braziliyada davom etayotgan World Boxing kubogi doirasida kecha 3 nafar bokschimiz musobaqadagi o‘zlarining ilk janglarini o‘tkazishdi.

-51 kgdagi vakilamiz Feruza Kazakovaga eski tanishi germaniyalik Maxi Klotzer duch keldi. Ular “Strandja” turnirida ham o‘zaro to‘qnash kelishgan va Feruza 4:1 hisobida g‘alaba qozongan edi. Bu safar ham jang qiziqarli va murosasiz kechdi. Referi Feruzani ta’qiqlangan harakatlarni ko‘p qildi, deb topdi va 2 ochko olib tashladi. Afsuski ushbu omil vakilamizni mag‘lubiyatiga sabab bo‘ldi. Yakuniy hisob 0:5 ko‘rinish oldi.

World Boxing kubogida -48 kgda yurtimiz sharafini himoya qilayotgan Farzona Fozilova ham dastlabki jangini o‘tkazdi. U marokashlik Vissal Faxirga qarshi ringga ko‘tarildi.

Butun raundlar mobaynida faol va aniq harakatlari evaziga Fozilova raqibasini 4:1 hisobida mag‘lubiyatga uchratdi. Shu tariqa Farzona keyingi bosqichga yo‘l oldi.

World Boxing kubogida -65 kg vazn toifasidagi vakilamiz Navbahor Hamidova ham o‘z yurishini boshladi. U ilk bosqichda shvesariyalik Anna Jenniga qarshi bahs yuritdi. Kutilganidek, Navbahor 4:1 hisobida g‘alaba qozondi va navbatdagi bosqichga yo‘l oldi.