BMT rahbarini Ukrainada ko‘rishni xohlashmaydi, lekin u kelmoqchi

BMT Bosh kotibi Antoniu Guterrishning idorasi u hali ham Ukrainaga kelish niyatida ekanini ma’lum qildi.

Birlashgan Millatlar Tashkiloti Bosh kotibi o‘rinbosari Farxan Haq ta’kidlaganidek, uning Ukrainaga rasmiy tashrifi «bekor qilinmagan, faqat keyinga surilgan».

«Biz tashrifni o‘zaro qulay vaqtda tashkil etishga harakat qilmoqdamiz. Ukraina prezidenti Vladimir Zelenskiy va BMT Bosh kotibi Antoniu Guterrish sentyabr oyida bo‘lib o‘tgan uchrashuvda tashrifni muhokama qilishgan», — dedi Haq.

***

Ukraina prezidenti Vladimir Zelenskiy Birlashgan Millatlar Tashkiloti Bosh kotibi Antoniu Guterrishning Qozondagi BRIKS sammitidagi ishtiroki tufayli Kiyevga tashrifini rad etdi, deb xabar berdi Ukraina prezidenti devonidagi yuqori martabali manba AFP agentligiga.

Payshanba kuni Qozon shahrida Rossiya prezidenti Vladimir Putinning oldida so‘zlagan nutqida Guterrish urushga chek qo‘yish uchun Ukrainada «adolatli tinchlikka» chaqirdi, ammo uning BRIKS sammitidagi ishtiroki Kiyevda norozilik uyg‘otdi.

«Qozondan keyin Guterrish Ukrainaga kelmoqchi edi, biroq prezident tashrifini tasdiqlamadi. Shu bois, Guterrish bu yerda bo‘lmaydi, xususan, Qozonda sog‘lom fikr va xalqaro qonunlar kamsitilgani sababli», — dedi manba AFP'ga.

Qozonda Putin bilan muzokaralar chog‘ida Guterrish «Rossiyaning Ukrainaga bostirib kirishi BMT Nizomi va xalqaro huquqni buzish ekanligini» takrorladi”, — deyiladi tashkilot bayonotida.