BMT Bosh kotibi: "Eronda namoyishchilarga qarshi zo‘ravonlikdan dahshatga tushdim"

BMT Bosh kotibi Antoniu Guterresh Eronda namoyishchilarga qarshi zo‘ravonlik haqidagi xabarlardan dahshatga tushganini aytdi.

Bosh kotib o‘zining ijtimoiy tarmoq sahifasida bayonot joylashtirdi.

"Men Eron rasmiylari tomonidan namoyishchilarga qarshi zo‘ravonlik va haddan tashqari kuch ishlatish haqidagi xabarlardan dahshatga tushdim, bu so‘nggi kunlarda o‘lim va jarohatlarga olib keldi. Fikr bildirish, uyushish va tinch yig‘ilishlar erkinligi huquqlari to‘liq hurmat qilinishi va himoya qilinishi kerak", deyiladi bayonotda.

Guterresh shuningdek, Eron rasmiylarini maksimal darajada vazmin bo‘lishga va keraksiz yoki nomutanosib kuch ishlatishdan tiyilishga chaqirdi. U aholining axborotga kirishini ta’minlash, jumladan, aloqani tiklash uchun choralar ko‘rish zarurligini ta’kidladi.

Eronda norozilik namoyishlari 28 dekabr kuni milliy valyutaning to‘satdan qulashi ortidan boshlandi va o‘shandan beri mamlakat bo‘ylab kamida 46 ta shaharga tarqaldi. Xabarlarga ko‘ra, o‘nlab odamlar, jumladan, kamida besh bola halok bo‘lgan va yana ko‘plari jarohatlangan. 8 yanvar kuni kechqurun respublikada internet va mobil aloqa uzilib qoldi, bu esa kuchayib borayotgan zo‘ravonlik sharoitida axborotga kirishni keskin cheklab qo‘ydi.