"Biz tibbiy yordamning barqaror, uzluksiz va kuchaytirilishini talab qilamiz..."

Jahon sog‘liqni saqlash tashkiloti (JSST) bosh direktori Tedros Adxanom Gebreyesus G‘azo sektoriga doimiy, uzluksiz va kuchaytirilgan tibbiy yordam yetkazilishiga chaqirdi, deb xabar beradi Anadolu agentligi.

Gebreyesus X platformasida (sobiq Twitter) ocharchilikka duch kelgan va Isroil hujumidan aziyat chekayotgan G‘azo sektoridagi vaziyat yuzasidan bayonot berdi.

Uning so‘zlariga ko‘ra, 1 avgustdan buyon JSST G‘azoga tibbiy buyumlar ortilgan 24 yuk mashinasi yetkazib bergan. Ushbu yuk mashinalarida asosiy dori-darmonlar va boshqa zarur tibbiy buyumlar bo‘lib, ular tibbiyot markazlari va shifoxonalarga tarqatiladi.

— Biz tibbiy yordamning barqaror, uzluksiz va kuchaytirilishini talab qilamiz. Bu G‘azo bo‘ylab odamlar hayotiga bevosita ta’sir qiladi, — dedi JSST rahbari.

Isroilning qattiq blokadasi ostidagi G‘azo sektori gumanitar falokatni boshidan kechirmoqda: ochlik keng tarqalgan, ichimlik suvi, dori-darmon, tibbiy va gigiyena vositalari taqchil.

Ochlikdan o‘lganlar soni, ayniqsa, bolalar orasida ortib bormoqda.