Bir qator Ukraina rasmiylari yer osti boyliklari bo‘yicha kelishuv tafsilotlari sizib chiqqani sababli poligrafdan o‘tkazildi

Bir necha ukrainalik amaldorlar AQSh va Ukraina o‘rtasidagi foydali qazilmalar bo‘yicha kelishuv tafsilotlari sizib chiqqani uchun poligrafda tekshiruvdan o‘tkazildi.

Bu haqda RBK-Ukraina xabar bermoqda.

Qayd etilishicha, Ukraina prezidenti Volodimir Zelenskiy Ukraina Xavfsizlik xizmatiga (UXX) AQSh va Ukraina o‘rtasidagi yer osti boyliklari bo‘yicha yangi kelishuv loyihasi tafsilotlari sizib chiqqandan keyin tekshiruv o‘tkazishni buyurgan.

Tergov kelishuv tafsilotlarini xalq deputati Yaroslav Jeleznyak e’lon qilganidan keyin boshlangan. Uning ta’kidlashicha, bu yakuniy hujjat emas va matn tahrirlanishi mumkin. Jeleznyak uning manbalari Ukraina rasmiylari emasligini ta’kidladi.