Belgiyaning Euroclear depozitariysi Rossiya sudi yurisdiksiyasini tan olmaydi

Euroclear Rossiya Markaziy bankining da’vo arizasiga mutlaqo rozi emasligini va uni asossiz deb hisoblashini bayon qildi.

Avvalroq Moskva Arbitraj sudi Rossiya Markaziy bankining da’vosi bo‘yicha, Rossiya aktivlari muzlatib qo‘yilgani sababli Euroclear'dan 200 milliard yevro undirish haqida qaror chiqargan edi.

"Bu Rossiyada Euroclear'ga qarshi qo‘zg‘atilgan ketma-ket sud da’volaridan navbatdagisidir. Bunday da’volar Yevropa Ittifoqi qonunchiligi tomonidan tan olinmaydi va Euroclear ushbu sud yurisdiksiyasini qabul qilmaydi. Euroclear sud qarori ustidan apellyasiya shikoyati berish niyatida", — deyiladi depozitariy javob bayonotida.

Euroclear Rossiya Bankining aktivlari xalqaro sanksiyalarga muvofiq muzlatilgan holatda qolayotganini alohida ta’kidladi.

2025 yilda Yevropa Ittifoqi Rossiyaning Yevropadagi 246 milliard dollarlik aktivlarini muddatsiz muzlatib qo‘yish haqida qaror qabul qilgan edi.