AQSh XAMAS rahbariyatining olti nafar a’zosiga qarshi sanksiyalar joriy qildi

Amerika hukumati Falastinning XAMAS harakati rahbariyatining olti nafar vakiliga qarshi sanksiyalar joriy qildi.

Bu haqda AQSh moliya vazirligi tarqatgan bayonotda aytiladi.

Hujjatga ko‘ra, cheklovlar XAMASning olti nafar yuqori martabali a’zolariga nisbatan qo‘llaniladi. Ular orasida harakatning xorijdagi vakillari va harakatning jangari qanoti hisoblangan Izziddin al-Qassam brigadalari a’zosi ham bor. Bundan tashqari, sanksiyalar ro‘yxatiga XAMAS manfaatlari yo‘lida mablag‘ yig‘ish bilan bog‘liq shaxslar, shuningdek, “G‘azoga qurol kontrabandasi” bilan aloqador shaxslar ham kiritilgan.

Amerika tomoniga ko‘ra, bu shaxslar terrorchilik faoliyatini targ‘ib qiladi, shuningdek, G‘azo sektoriga pul va tovarlar jo‘natish ishlarini muvofiqlashtiradi.

“AQSh Moliya vazirligi XAMASning qo‘shimcha daromad olish borasidagi sa’y-harakatlarini to‘xtatishga sodiq qoladi va guruhning terrorchilik faoliyatiga yordam berganlarni javobgarlikka tortadi”, — dedi departament.

Eslatib o‘tamiz, sanksiyalar ro‘yxatiga kiritish AQShdagi aktivlarni muzlatish va Amerika fuqarolari va kompaniyalarining uning ayblanuvchilari bilan biznes yuritishini taqiqlashni anglatadi.