AQSh va Eron xufiyona muzokaralar olib borgan

AQSh prezidenti Donald Tramp ma’muriyati Eron fuqarolarini deportasiya qilish bo‘yicha Tehron bilan yopiq muzokaralar olib borgan, ushbu muloqotlar hatto ikki mamlakat o‘rtasidagi harbiy harakatlar boshlanganidan so‘ng ham davom etgan. Bu haqda sud hujjatlariga tayanib Associated Press (AP) agentligi xabar bermoqda. Hujjatlarda Vashington va Tehron harbiy to‘qnashuvlarga qaramay, immigrasiya masalalari bo‘yicha hamkorlikni to‘xtatmagani qayd etiladi.

Iron-Amerika huquqiy himoya jamg‘armasi ma’lumotlariga ko‘ra, so‘nggi haftada AQSh Immigrasiya va bojxona xizmati (ICE) tomonidan ushlangan kamida 12 nafar Eron fuqarosiga bo‘lajak deportasiya haqida ogohlantirish xati topshirilgan. Ba’zi mahkumlarga majburiy chiqarib yuborish jarayoni 8 noyabrdayoq amalga oshirilishi mumkinligi bildirilgan.

Vashingtondagi Pakiston elchixonasi huzuridagi Eron diplomatik missiyasi vakillari qo‘lga olinganlar bilan bog‘lanib, ularni Pokiston orqali Eronga yuborish rejalari haqida xabardor qilgan. Shuningdek, surishtiruv hujjatlari AQSh immigrasiya xizmatlari deportasiya qilinishi kerak bo‘lgan shaxslar to‘g‘risidagi ma’lumotlarni Eron hokimiyat idoralariga taqdim etganini ko‘rsatadi.

Xizmat yozishmalaridan ma’lum bo‘lishicha, 2025 yilning sentyabr va dekabr oylarida, shuningdek, 2026 yilning yanvar oyida AQSh va Eron uchta maxsus reys tashkillashtirib, ushbu reyslar orqali 100 dan ortiq eronlikni vataniga qaytargan. Biroq, AQSh Ichki xavfsizlik vazirligi Tehronga boshpana so‘rab qilingan murojaatlarga oid ma’lumotlar topshirilganini rad etmoqda.

15 oktyabr kuni bo‘lib o‘tgan sud majlisida federal sudya Ana Reyes AQSh urush holatida bo‘lgan mamlakatga odamlarning qaytarilishi mumkinligidan jiddiy xavotir bildirdi. U Tramp ma’muriyatini deportasiya reyslari haqida oldindan xabardor qilish bo‘yicha sud talabini buzishning oqibatlaridan ogohlantirdi.

Huquqni muhofaza qiluvchilar ushlanganlarning Eronga qaytarilishi ularning hayoti va xavfsizligiga bevosita tahdid solishi mumkin deb hisoblamoqda. AQSh rasmiylari esa deportasiya bo‘yicha qonuniy sud qarorlarini ijro etayotganliklarini ta’kidlamoqda.