AQSh Ukrainaga keng miqyosli havo hujumini kutmoqda

AQShning Kiyevdagi elchixonasi keyingi bir necha kun ichida istalgan vaqtda sodir bo‘lishi mumkin bo‘lgan “potensial jiddiy havo hujumi” haqida ma’lumotga ega ekanligini aytdi. Bayonot diplomatik missiyaning rasmiy saytida 9-may kuni kechqurun e’lon qilingan.

💬 "Elchixona, har doimgidek, AQSh fuqarolariga havo hujumi haqida ogohlantirish paydo bo‘lgan taqdirda darhol boshpana izlashga tayyor bo‘lishni maslahat beradi", deyiladi bayonotda.

Shu bilan birga, Ukraina kuzatuv kanallari AQSh Federal aviasiya ma’muriyatining Rossiya 12-13 may kunlari Astraxan viloyatidagi Kapustin Yar poligoni ustidagi havo hududini yopib qo‘yishi haqida 8 maydagi xabariga e’tibor qaratdi.

Rossiya prezidenti Vladimir Putin tomonidan e’lon qilingan bir tomonlama o‘t ochishni to‘xtatish kelishuvi 8-maydan kuchga kirdi va Kremlga ko‘ra, 11-may yarim tungacha davom etadi.Moskva Ukrainani tashabbusga qo‘shilishga chaqirdi va rad etilgan taqdirda “oqibatlar” bilan tahdid qildi. Kiyev bu taklifni rasman qo‘llab-quvvatlamadi.

Rossiya Mudofaa vazirligi o‘t ochishni to‘xtatish davrida Ukraina Qurolli kuchlari o‘t ochishni to‘xtatish tartibini 5000 dan ortiq buzishga yo‘l qo‘yganini da’vo qilmoqda.

Ukraina rasmiylarining bildirishicha, Rossiya kuchlari o‘t ochishni to‘xtatish haqidagi da’volarga qaramay o‘qqa tutmoqda. Biroq rejim boshlanganidan beri har ikki tomon ham uchuvchisiz samolyotlar yoki raketalar yordamida tungi yirik hujumlar haqida xabar bermagan.