AQSh Isroil haqidagi maxfiy ma’lumotlarning sizib chiqishini tekshirmoqda

Juma kuni «o‘ta maxfiy» bo‘lgan ikkita hujjat internetga tarqalib, Isroilning Eronga ehtimoliy hujumga tayyorgarligi tafsilotlarini oshkor qildi. Materiallar Middle East Spectator Telegram kanalida chop etilgan.

Milliy geofazoviy-razvedka agentligi va AQSh Milliy xavfsizlik agentligiga tegishli ekanligi taxmin qilinayotgan hujjatlarda 15-16 oktabr kunlari qurol harakati, samolyotlarga yonilg‘i quyish mashqlari va yashirin dron operasiyalari haqida ma’lumotlar bor.

Amerika rasmiylari materiallarning haqiqiyligini inkor etmadi. CNN ma’lumotlariga ko‘ra, ism-sharifi oshkor qilinmagan amaldorlardan biri ma’lumotlarning sizib chiqishini «chuqur tashvishli» deb atadi. Voqea AQSh hukumati tomonidan tekshirilmoqda.

Ma’lumotlarning oshkor etilishi Bosh vazir Benyamin Netanyaxu 1-oktabr kuni Isroilga qarshi 200 ballistik raketa uchirilgani uchun Tehron «to‘lash»ga va’da berganidan uch hafta o‘tib sodir bo‘ldi. Isroil Eronning yadroviy dasturiga emas, balki uning harbiy bazalari va razvedka obektlariga zarba berishi kutilmoqda.

Bir kun avval Netanyaxu Kesariyadagi qarorgohiga uchuvchisiz samolyot hujumini «Eron agentlari»ning uni va uning rafiqasiga o‘ldirishga urinishi bilan bog‘ladi va buni «achchiq xato» deb atadi.

«Bugun meni va xotinimni o‘ldirmoqchi bo‘lgan Eron agentlari jiddiy xatoga yo‘l qo‘yishdi. Bu meni va Isroil davlatini avlodlar uchun xavfsizligimizni ta’minlash uchun dushmanlarimizga qarshi urushni davom ettirishdan to‘xtata olmaydi», deb yozdi u.

Tehron Isroilning ehtimoliy hujumini javobsiz qoldirmasligini ochiq aytdi. Bu haqda Eron tashqi ishlar vaziri Abbos Araqchi turk jurnalistlari bilan suhbatda ma’lum qildi.

«Agar Isroil bizga hujum qilsa, biz javob berishga tayyormiz. Biz shunga yarasha javob beramiz, ammo Isroil bizning tayyorligimizni sinab ko‘rmaydi, deb umid qilamiz», — dedi Araqchi Turkiyaning NTV telekanaliga bergan intervyusida.

Vazirning so‘zlariga ko‘ra, Isroil harbiylarining hujumi «qizil chiziq»ni kesib o‘tish sifatida baholanadi, ammo Eron shoshqaloqlik bilan harakat qilmoqchi emas.

Prezident Bayden Berlinga tashrifi chog‘ida Isroil qachon va qanday javob qaytarishni rejalashtirayotganini yaxshi tushunganini aytdi. U Isroil va Eron o‘rtasidagi mojaroni «bir muncha vaqt» hal qilish imkoniyatini ta’kidladi.

Muntazam ravishda Eronparast kontentni nashr etuvchi Middle East Spectator Telegram kanali hujjatlarning «haqiqiyligi haqida hech qanday ma’lumotga ega emasligini» va «hech qanday davlat idorasiga aloqasi yo‘qligini» aytdi.

AQSh Mudofaa vazirligi va Isroil armiyasi vakillari taxminiy razvedka ma’lumotlariga izoh berishdan o‘zlarini tiyishdi.