AQSh G‘azo bo‘yicha yangi rezolyusiya loyihasiga veto qo‘ydi

Birlashgan Millatlar Tashkilotining Xavfsizlik Kengashining 14 a’zosi tomonidan ovoz berilgan loyiha AQShning yagona ovozi bilan rad etildi.

Qo‘shma Shtatlar Birlashgan Millatlar Tashkiloti Xavfsizlik Kengashida G‘azoda zudlik bilan doimiy o‘t ochishni to‘xtatish va insonparvarlik yordamiga cheklovsiz kirishni talab qiluvchi yangi rezolyusiya loyihasiga veto qo‘ydi.

Isroil armiyasi G‘azo sektorida doimiy ishg‘ol rejasini amalga oshirishni boshlaganidan so‘ng, BMT Xavfsizlik Kengashi kun tartibiga “darhol va doimiy o‘t ochishni to‘xtatish hamda insonparvarlik yordamiga cheklovsiz kirish”ni talab qiluvchi rezolyusiya kiritildi.

Birlashgan Millatlar Tashkiloti Xavfsizlik Kengashining 14 a’zosi tomonidan qo‘llab-quvvatlangan hujjat AQShning yagona qarshiligi bilan rad etildi.

Ovoz berishdan oldin AQSh vakili loyihaga veto qo‘yish “hech kimni hayratlantirmasligini” ta’kidlab, unda “HAMAS qoralanmagani va Isroilning o‘zini himoya qilish huquqi tan olinmagani”ni qayd etdi.

AQSh diplomati rezolyusiya loyihasi “HAMASni qo‘llab-quvvatlashi va BMT Xavfsizlik Kengashida tarqalgan yolg‘on rivoyatlarni asossiz qonuniylashtirishi”ni aytdi hamda “barcha mahbuslar ozod etilmasdan turib, G‘azoda o‘t ochishni to‘xtatib bo‘lmasligini” ta’kidladi.

Isroilning G‘azoga hujumi

19 yanvardan kuchga kirgan o‘t ochishni to‘xtatish kelishuvidan so‘ng Isroil armiyasi 18 mart kuni ertalabdan intensiv hujumlarni qayta boshladi.

2023 yil 7 oktyabrdan beri Isroilning G‘azo sektoriga qilgan hujumlari natijasida kamida 65 141 falastinlik halok bo‘ldi, 165 925 nafari yaralandi.

18 martdan buyon, ya’ni Isroil sulhni buzganidan so‘ng, G‘azoga qilingan hujumlarda 12 590 kishi halok bo‘ldi, 53 884 kishi yaralandi.

27 maydan buyon G‘azoda Isroil-AQSh boshchiligidagi “G‘azo gumanitar yordam jamg‘armasi” orqali tarqatilgan yordam nuqtalariga qilingan tizimli hujumlar natijasida 2 513 kishi halok bo‘ldi, 18 414 kishi yaralandi.

Isroil armiyasi G‘azo sektorida doimiy ishg‘olni kengaytirish rejasini amalga oshirishga kirishdi. Bosh vazir Binyamin Netanyaxu esa sektori to‘liq bosib olishlarini ma’lum qildi.