Andijon va Namangan viloyatlarida aksiz markasiz tamaki mahsulotining muomalaga kiritilishining oldi olindi

Bosh prokuratura huzuridagi Departamentning Andijon viloyati boshqarmasi, DXX va Bojxona xodimlari hamkorligida o‘tkazilgan tezkor tadbirda fuqaro X.Z. (muqaddam sudlangan) o‘zining “Tracker” rusumli avtomashinasida xorijiy davlatda ishlab chiqarilgan, aksiz markasiz “Esse Change” nomli tamaki mahsulotini qonunga xilof ravishda muomalaga kiritish maqsadida olib ketayotgan vaqtida ushlanib, avtomashina yukxonasidan umumiy bahosi 80 mln so‘mlik 2 000 quti tamaki mahsuloti ashyoviy dalil sifatida olingan.

Shuningdek, Departamentning Namangan shahri bo‘limi tomonidan o‘tkazilgan tezkor tadbirda YATT “X.A.”ning savdo do‘koni ko‘zdan kechirilganda, tegishli hujjatlari bo‘lmagan turli nomdagi 560 quti tamaki mahsulotlarining sotuvga qo‘yilganligi aniqlanib, ushbu mahsulotlar ashyoviy dalil sifatida olingan.

Mazkur holatlar yuzasidan Jinoyat kodeksining 25, 186-1-moddasi (etil spirti, alkogolli mahsulot va tamaki mahsulotini qonunga xilof ravishda muomalaga kiritish yoki ishlab chiqarish) bilan jinoyat ishlari qo‘zg‘atilib, tergov harakatlari o‘tkazilmoqda.