Girkin Ukrainani Gruziyaga almashtirishni taklif qilmoqda. G‘alaba qozonish uchun

Jazoni axloq tuzatish muassasasida o‘tayotgan Donbass ayirmachilarining sobiq sardori Igor Girkin (Strelkov) o‘z tarafdorlarini Rossiyaning Ukrainaga qarshi urushi tez orada tugashiga umid bog‘lamaslikka undadi.

Ushbu bayonot Girkinning hamfikrlari tomonidan uning kanalida e’lon qilindi.

"Bu yil urush... tugamaydi. Oddiy sabab shuki, Ukraina tashqi kuchlar yordamisiz Rossiya Federasiyasini yengolmaydi, Rossiya esa Ukrainani mag‘lub etolmaydi, chunki bizda shunday "iste’dodli" rahbarlar va generallar borki, 4 yildan beri urushayapmiz - va hech qanday natija yo‘q. Biz "kuchliroq" raqib tanlashimiz kerak edi, masalan, Gruziya yoki shunga o‘xshash biror davlatni. Shunda balki eplagan bo‘larmidik," deya yozadi Girkin.

Separatistning fikricha, "qisqa muddatli loy mavsumidan keyin jangovar harakatlar yanada shafqatsizroq tus oladi: bahor-yoz kampaniyasi davomida bu urushda kim g‘alaba qozonishi masalasi hal etiladi va afsuski, dushman bizning armiyamiz va davlatimizdan bu unvonni tortib olish uchun yetarli kuch, vosita va zaxiraga ega."

"Mening bashoratimcha, aprel/may/iyun oylarida dushman ko‘plab yo‘nalishlarda faolligini keskin oshiradi va ularning hujumlari Rossiyaning "eski" hududlariga ham qaratiladi... Butun front bo‘ylab, shu jumladan Kursk va Belgorod chegaralarida ham shiddatli janglar davom etmoqda. Dushman jangsiz bir qadam ham orqaga chekinmayapti, buning ustiga o‘zi uchun zarur deb bilgan har bir joyda hujum va qarshi hujumga o‘tmoqda... Hech qayerda Ukraina Qurolli Kuchlari tor-mor qilinmagan va tartibsiz chekinmayapti - dushman g‘oyat qat’iyat bilan jang qilmoqda va o‘z g‘alabasiga ishonmoqda," - dedi Girkin.