Amerikaliklar abort uchun ham ovoz berdi

Bu yil AQShda saylovchilar nafaqat keyingi to‘rt yil ichida Oq uyda kimni ko‘rishni xohlashlarini tanladilar. Abortlar, marixuana iste’moli, ta’lim, tashqi chegaralar xavfsizligi masalalari ham mahalliy referendumlarga qo‘yildi.

Abort huquqini himoya qilish masalasi Arizona, Kolorado, Florida, Merilend, Missuri, Montana, Nebraska, Nevada, Nyu-York va Janubiy Dakota shtatlaridagi saylov byulletenlariga kiritilgan.

Ikki shtatda - Kolorado va Merilendda saylovchilar abort huquqini mustahkamlaydigan tuzatishlarni yoqlab ovoz berishdi. Merilendda konstitusiyaga reproduktiv erkinlikni kafolatlovchi seksiya qo‘shiladi. Hozir shtatda homila hayotga layoqatli bo‘lmaguncha homiladorlikni to‘xtatish mumkin.

Koloradoda qabul qilingan tuzatish nafaqat abort huquqini himoya qiladi, balki homiladorlikni to‘xtatish uchun davlat mablag‘laridan foydalanishga imkon beradi. Ayni paytda, Merilend shtatida bo‘lgani kabi, abort uchun cheklovlar yo‘q, ammo Medicaid jamg‘armalaridan - kam ta’minlanganlar uchun federal sog‘liqni saqlash dasturidan - homiladorlikni to‘xtatish uchun foydalanishni taqiqlash mavjud.

Nyu-York shtatida saylovchilar abort huquqini himoya qiladigan tuzatish uchun ovoz berishdi, deb taxmin qilmoqda Associated Press.

"1-taklif" yoki "Teng huquqlar to‘g‘risidagi tuzatish" deb nomlangan tashabbus shtat konstitusiyasiga jinsiy oriyentasiya, etnik kelib chiqishi, yoshi, jinsi, imkoniyati cheklanganligi yoki homiladorligi asosida kamsitishni taqiqlashni qo‘shishni taklif qiladi. Hozirda konstitusiyaga faqat irqiy mansubligi, terisining rangi, e’tiqodi va diniga qarab kamsitishni taqiqlash kiritilgan. Shtatda abort huquqini himoya qiluvchi qonunlar allaqachon amal qilmoqda, ammo konstitusiyaga kiritilgan tuzatish uni murakkablashtirishi mumkin.

Missuri shtatida saylovchilar shtat konstitusiyasiga 24 haftagacha bo‘lgan muddatga abort qilishga ruxsat beruvchi tuzatishni ma’qulladilar.