Adilbek Qosimaliyev Qirg‘iziston bosh vaziri etib tayinlandi

Adilbek Qosimaliyev Qirg‘iziston Vazirlar Mahkamasi raisi etib tayinlandi.

Qirg‘iziston prezidenti farmoniga ko‘ra, Konstitusiyaning 70-moddasi 1-qismi 2-bandiga muvofiq, Adilbek Aleshovich Qosimaliyev Vazirlar Mahkamasi rahbari — Prezident Administrasiyasi rahbari etib tayinlandi.

Eslatib o‘tamiz, u avval Akilbek Japarovning birinchi o‘rinbosari lavozimida ishlagan.

Adilbek Qosimaliyev 1960 yil 1 dekabrda Issiqko‘l viloyati, Tup tumani Dolon qishlog‘ida tug‘ilgan. 1984 yilda Leningrad moliya-iqtisodiyot institutini iqtisodchi mutaxassisligi bo‘yicha tamomlagan.

2015-2018 yillarda Qirg‘iziston moliya vaziri bo‘lgan. 2021-2022 yillarda - Prezident Administrasiyasi rahbari o‘rinbosari.

2022 yil iyun oyida u Vazirlar Mahkamasi rahbarining birinchi o‘rinbosari vazifasini bajaruvchi bo‘ldi.