50 mingga yaqin o‘qituvchilar mehnat sharoitlarini yaxshilanishini talab qilib, norozilik namoyishi o‘tkazishdi

Avstraliyaning Kvinslend shtatida 50 000 ga yaqin o‘qituvchilar mehnat sharoitlarini yaxshilash talabi bilan 15 yil ichida birinchi marta ish tashlashga chiqdi.

Bu haqda 9News portali xabar berdi.

"48 ming o‘qituvchi ishtirok etgan ish tashlash Kvinslenddagi barcha 1266 ta davlat maktabi va 560 ming o‘quvchini qamrab oldi", — deyiladi maqolada.

Namoyishlar o‘qituvchilar kasaba uyushmasi hukumatning uch yil davomida ish haqini oshirish taklifini rad etib, o‘rniga o‘qituvchilar yetishmasligi muammosini hal etish va ish joyida xavfsizlikni yaxshilashni talab qilganidan keyin boshlangan.

Muammoni hal qilish uchun kasaba uyushmasi va vazirlar mahkamasi vakillari Kvinslend sanoat aloqalari komissiyasida muzokaralar olib boradi.