Yaponiya OFKni tark etmoqchi

Yaponiya Osiyo Futbol Konfederasiyasi (OFK) tarkibidan chiqib, yangi Sharqiy Osiyo Federasiyasini tuzishi mumkin.

Ushbu qadam Yaponiya futbol assosiasiyasi (JFA)ning tashkilotdagi firibgarlik va korrupsiyaga qarshi noroziligi ortib borayotgani bilan bog‘liq.

Iroqning UTV nashri ma’lumotiga ko‘ra, JFA Saudiya Arabistonida o‘tkazilgan Elit Osiyo Chempionlar Ligasi musobaqasi atrofidagi bahsli qarorlardan so‘ng OFKda "badavlat arab mamlakatlari ta’siri" kuchayib borayotganidan g‘azablanmoqda.

Yaponiyaning "Vissel Kobe" klubi "Shandun Tayshan" jamoasining musobaqani tark etishi oqibatida turnir jadvalidagi o‘rnini yo‘qotganidan keyin jiddiy zarar ko‘rdi. Shunga qaramay, OFK Kobeni avvalgi voqea uchun 10 ming dollar miqdorida jarimaga tortdi. Bu qaror ikki yoqlama standart sifatida baholandi.

JFA Yaponiya klublari va futbolchilari, jumladan Takefusa Kubo kabi Yevropada o‘ynaydigan yulduzlar, adolatsiz taqvim va boshqaruv muammolaridan aziyat chekayotganini ta’kidlamoqda.

Manbaning qo‘shimcha qilishicha, agar Sharqiy Osiyo tashkiloti tuzilsa, Yaponiyaga boshqa davlatlar, jumladan, Iroq ham qo‘shilishi mumkin. Bu harakat Osiyo futbolining hozirgi kuch tuzilmasini larzaga solishi mumkin.