Зеленский: Украина Россия босиб олган ҳудудларни тарк этиш эвазига НАТОга кириши мумкин

Украина Президенти Владимир Зеленский америкалик машҳур журналист Лекс Фридманга берган интервьюсида “Мамлакат Луганск, Донецк, Запорожье ва Херсон вилоятлари, шунингдек Қримдан НАТОга аъзо бўлиш таклифи эвазига воз кечишга рози бўладими?” деган саволга жавоб берди. Ушбу видео суҳбат америкалик журналистнинг ижтимоий тармоқдаги саҳифасида эълон қилинган.

Украинанинг “ukr.net” нашри ёзишича, давлат раҳбари Россия томонидан босиб олинган ҳудудларни тарк этиш эвазига НАТОга қўшилиш масаласи кўриб чиқилишини қайд этган. Муайян шартлар бажарилган тақдирдагина мамлакат бунга рози бўлади.

– Қонунан, мамлакат НАТОга таклиф қилинган, бошқа барча ҳудудларимиз назорат остида, ҳарбий тузилма Украинага қарашли қисмда ҳаракатланиши мумкин, – дея Президент нутқидан иқтибос келтирилган “Анадолу” ахборотида. Украина урушни тўхтатишнинг дипломатик йўлини кўрсагина, воқеалар шундай ривожланади.

Қозоғистоннинг “Tengre News” сайти Зеленский АҚШнинг сайланган Президенти Дональд Трамп ҳам Россия энергетикасининг жаҳон бозорига киришига йўл қўймаслик учун РФга қарши санкция жорий қилиши зарурлигини таъкидлаганига эътибор қаратган.