Зеленский Уиткофф ва Кушнер ташрифини «Patriot тизимларидан ҳам самаралироқ» деб атади

Украина президенти Владимир Зеленский Стив Уиткофф ва Жаред Кушнер билан музокаралардан сўнг урушнинг тез орада тугаши ҳозирча кутилмаётганини билдирди. Унинг айтишича, агар ҳарбий ҳаракатлар қишгача давом этса, Украинага Ғарб иттифоқчиларидан алоҳида «қишки ёрдам пакети» керак бўлади.

Зеленский АҚШ вакиллари билан музокараларни «ниҳоятда мазмунли» деб атади. Шу билан бирга, у ҳазил тариқасида уларнинг Киевда бўлиши «Patriot ҳаво мудофаа тизимларидан ҳам самаралироқ иш берганини» айтди. Унинг сўзларига кўра, ташриф давомида Владимир Путин Киевга зарбалар беришни уч кунга тўхтатган, Украина эса Москвага ҳужумлардан тийилган.

Зеленский яқин вақт ичида Украина, Европа ва АҚШ иштирокида янги музокаралар ўтказилиши кераклигини маълум қилди. Бироқ унинг фикрича, ҳудудий масалаларни ўз ичига олган энг муҳим муаммоларни фақат юқори даражадаги учрашувда ҳал қилиш мумкин.

Кушнер ва Уиткофф эса музокараларда илгарилаш бўлганини таъкидлади.

«Биз Москвада олға силжишга эришдик. Бизда янги ғоялар бор ва уларни Киевга олиб келдик», — деди Уиткофф.

Кушнер Украина, Россия ва АҚШ ўртасидаги уч томонлама музокараларни қайта тиклаш тарафдори эканини билдирди.