Зеленский Трампнинг Россияга қарши санкцияларни бекор қилиш қарорини «Америка санкциявий блэкаути» деб атади

Украина президенти Владимир Зеленский АҚШ президенти Дональд Трампнинг Россияга қарши санкциялар жорий этишдан воз кечиш қарорига муносабат билдирди. Гап марҳум сенатор Линдси Грэм номи билан боғлиқ қонунда назарда тутилган чекловлар ҳақида бормоқда.

Жума куни кечқурун Трамп фармонни имзолади. Унга мувофиқ, Россияга қарши янги кенг кўламли санкциялар ҳамда Россиядан нефть ва газ сотиб олувчи давлатларга нисбатан тарифлар жорий этилиши кўзда тутилган, бироқ улар дарҳол бекор қилинган.

Шанба куни эрталаб Зеленский Россия ҳарбийлари Украина энергетика инфратузилмасига кучли зарбалардан бирини берганини маълум қилди. Унинг сўзларига кўра, мамлакатнинг турли ҳудудларида электр энергиясини ишлаб чиқариш ва узатишга оид 15 дан ортиқ муҳим объект ҳужумга учраган.

Украина расмийлари зарбалар оқибатида Житомир вилоятида юз минглаб истеъмолчилар электр таъминотисиз қолганини, Винница шаҳрида ҳам электр энергияси ўчирилганини билдирди. Мамлакат бўйлаб режали электр узилишлари жорий этилган.

«Россияликлар энергетикамизга бундай кенг кўламли зарба берган бир пайтда, афсуски, Америкада Линдси Грэм қонунини амалда бутунлай эътиборсиз қолдиришга қарор қилинди. Ҳолбуки, бу қонун урушни тўхтатиш учун Россияга ҳақиқий босим ўтказиши керак эди», — деди Зеленский.

Унинг таъкидлашича, ушбу қонун Украинага катта ёрдам бериши мумкин эди ва ҳали ҳам шундай имконият мавжуд. Бунинг учун эса қонун амалда ишлаши зарур.

«Американинг санкциявий блэкаути, тажовузкорга босимнинг юмшатилиши ва Путин учун молиявий мукофотлар — буларнинг барчаси уни ҳужумларни давом эттиришга ундайди. Мавқеимизни бой бермаслигимиз ва урушни тугатишга ҳаракат қилишимиз керак», — дея хулоса қилди Украина президенти.

Аввалроқ Зеленский Трампнинг Россия билан дизель ёқилғиси етказиб бериш бўйича келишувини ҳам танқид қилган эди. Келишувга кўра, Москва жаҳон бозорига бир неча партия дизель ёқилғиси етказиб бериши кутилмоқда.

Трамп ушбу чора орқали Эрон билан уруш фонида АҚШ Конгрессига оралиқ сайловлар арафасида кўтарилган дизель нархларини пасайтиришга умид қилмоқда.