Зеленский: "Россия Украинага зарба беришни тўхтатганидан кейин биз ҳар қандай форматдаги суҳбатга тайёрмиз"

Тинчлик музокараларини бошлаш учун Россия Украинага зарба беришни тўхтатиши керак. Шундан сўнг, уруш тугаганидан кейин ечим излаш мумкин.

Бу ҳақда Украина етакчиси Владимир Зеленский кечки мурожаатида айтиб ўтди.

"Зарбаларни тўхтатиш, қотилликларни тўхтатиш ва шундан сўнг музокаралардан ечим излаш керак. Биз суҳбатнинг ҳар қандай форматига тайёрмиз. Россия зарбалар ва урушни тўхтатиши керак," - деди у.

Шунингдек, у Люксембург ташқи ишлар ва мудофаа вазирлари билан музокаралар ўтказганини маълум қилди: "Авваламбор, биз Европадаги ҳамкорлигимиз ва қўллаб-қувватлашимиз ҳақида гаплашдик. Украинани қўллаб-қувватлаганингиз учун миннатдорчилик билдирмоқчиман."

Шунингдек, Зеленскийнинг сўзларига кўра, у Люксембург вазирлари билан дипломатия, камида 30 кун давомида ўт очишни тўлиқ тўхтатиш зарурлиги ҳақида гаплашган.