Зеленский: "Агар Россия Украина энергетика объектларига ҳужумларни тўхтатса, Украина ҳам Россия энергетика секторининг нозик объектларига зарба бермасликка тайёр"

Норвегия пойтахти Ослода бўлиб ўтган Россия-Украина можаросини ҳал қилиш бўйича музокараларда Киевга хавфсизлик кафолатларини бериш, энергетик сулҳ ва Россия ҳамда Украина етакчилари Владимир Путин ва Владимир Зеленскийнинг эҳтимолий учрашуви муҳокама қилинди.

Бу ҳақда Украина президенти ўзининг Telegram-каналида ёзди.

Унинг сўзларига кўра, АҚШ президентининг махсус вакили Стив Уиткофф Россия томонига топширадиган ҳужжатда хавфсизлик кафолатларининг турли шакллари белгилаб қўйилган.

"Агар Россия Украина энергетика объектларига ҳужумларни тўхтатса, Украина ҳам Россия энергетика секторининг нозик объектларига зарба бермасликка тайёр. Киев Вашингтоннинг энергетик сулҳ тузиш ҳақидаги таклифини қўллаб-қувватлади, бироқ Москва зарба беришда давом этди. Биз можарони ҳал қилишнинг турли вариантларини таклиф қилмоқдамиз ва ечим излашда давом этяпмиз", — деб қайд этди у.

У, шунингдек, фақат олий даражада ҳал қилиниши мумкин бўлган масалаларни кўриб чиқиш учун етакчиларнинг эҳтимолий уч томонлама учрашуви ғояси устида иш олиб борилаётганини маълум қилди. Зеленскийнинг айтишича, Уиткофф 21 октябрь куни Россияга ташрифи давомида ушбу таклифни Путин билан муҳокама қилади.

Эслатиб ўтамиз, 20 октябрь куни Ослода Европа, Украина ва АҚШ вакиллари ўртасида учрашув бўлиб ўтган эди. Финляндия Президенти Александр Стубб музокараларда Россия-Украина можаросини ҳал қилишда "ҳақиқий илгарилаш"га эришилганини таъкидлаган эди.