Йўловчилар учун қулайлик: Тошкент аэропортида такси олиш тизими янгиланди

«Ислом Каримов номидаги Тошкент халқаро аэропорти» МЧЖда йўловчиларга хизмат кўрсатиш мақсадида такси олиш тизими такомиллаштирилди. Энди бир қатор расмий ташувчилар ва агрегаторлар йўловчиларни учиб келиш терминали олдидаги биринчи йўлакдан тўғридан тўғри олиб кетиши мумкин.

«Ислом Каримов номидаги Тошкент халқаро аэропорти» МЧЖда бундан буён бир нечта такси хизматлари ва агрегаторлари йўловчиларни учиб келиш терминалининг олдидаги биринчи йўлакдан тўғридан тўғри олиб кетиши мумкин бўлади.

Маълум қилинишича, биринчи йўлакдан Taxi Millennium, Let’s Trip, Uzviptransservice, Sicht ва Taxi Airport Tashkent расмий ташувчилари, шунингдек, Yandex Go йўловчилари таксига чиқиши мумкин. Расмий ташувчилар хизматидан учиб келиш залида фаолият юритаётган ягона диспетчерлик хизмати орқали буюртма бериш йўли билан фойдаланиш мумкин. Yandex Go таксиларига эса мобил илова орқали буюртма бериш имконияти сақланиб қолган.

Қайд этилишича, аэропортда фаолият юритувчи расмий ташувчилар агрегаторлар нархлари билан рақобатлаша оладиган махсус бюджетли тарифларни жорий қилган. Жумладан, шаҳар ичидаги тарифлар 50 000 сўмдан бошланади. Шу билан бирга, йўловчилар гуруҳ ва оилавий трансферларни ҳам ўз ичига олган турли таклифлардан бирини танлашлари мумкин.

Яна бир қулайлик сифатида, биринчи йўлакда йўловчини қабул қиладиган ҳайдовчилар махсус йўлакда бепул тўхташи ва йўловчиларни 20 дақиқагача кутиши мумкин. Йўловчиларга йўналиш топишда енгиллик яратиш мақсадида аэропортда такси олиш зонасига олиб борадиган белгилари ҳам ўрнатилган.