Японияда АҚШ ҳарбийларига комендантлик соати жорий этилди

Япониянинг Окинава префектурасида жойлашган АҚШ ҳарбийларига бир ойлик комендант соати жорий этилди. Шунингдек, уларга спиртли ичимликлар истеъмол қилиш тақиқланди. Бунга денгиз пиёдаси маҳаллий аёлни ўлдирганлик ва талончиликда гумон қилингани сабаб бўлди. Бу ҳақда Reuters хабар берди.

Маълум қилинишича, ҳарбийлар интизомий ўқув машғулотларидан ўтказилади. 20 ёшли кичик капрал Девин Жейкоб Баллард 3 октябрь куни жанубий префектуранинг пойтахти Наҳа шаҳридаги меҳмонхонада 39 ёшли Анна Ягини ўлдирганликда ҳамда унинг ҳамёни ва рюкзагини олиб кетганликда гумон қилинмоқда. Баллард айбловларни рад этган.

Бу ҳолат Тайван ва Хитой яқинидаги оролларда АҚШ қўшинларининг кўплиги сабабли хавотирларни кучайтирди. Америка расмийлари бу Шарқий Осиё хавфсизлиги учун муҳим бўлган алоқаларга путур етказиши мумкинлигидан хавотир билдирмоқда.

“Қўшниларимиз билан ҳар бир мулоқот жамоамиз учун муҳим бўлган ишончни йўққа чиқаради ёки мустаҳкамлайди. Ишончга путур етганда, бу бизнинг иттифоқимиз кучи ва ушбу минтақа хавфсизлигига таъсир қилади”, деди генерал-лейтенант Бенжамин Уотсон 6 октябрь куни эълон қилинган баёнотида.

Уоцоннинг қўшимча қилишича, қўшинлар стандартлар ва интизом бўйича ўқитилаётган вақтда Окинавадаги барча АҚШ ҳарбий амалиётлари 48 соатга тўхтатиб турилади.

Япония бош вазири Санаэ Такаичи бу қотилликни “ўта шафқатсиз ва қабиҳ” деб баҳолади. Унинг айтишича, Япония АҚШга қатъий эътироз билдирган ва келгусида бундай воқеаларнинг олдини олиш чораларини кўришни талаб қилган.

Токиода Окинава губернатори Гента Кожа билан учрашувда Такаичи Япония ва АҚШ бундай ҳодисаларнинг олдини олиш бўйича самарали чора-тадбирлар устида маслаҳатлашишда давом этишини айтди. Мазкур воқеа Наҳа ва Токио шаҳарларида норозилик намойишларини келтириб чиқарди.

Японияда АҚШ Қуролли кучларининг энг йирик контингенти жойлашган. 18 минг денгиз пиёдаларининг аксарияти Окинавада жойлашган. Бу оролни АҚШ Иккинчи жаҳон уруши охиридан 1972 йилгача назорат қилган.

Окинава Тайвандан атиги 100 километр узоқликда жойлашган. Шу боис Токио ва Вашингтон бу оролни Хитойнинг эҳтимолий ҳарбий хавфини жиловлаб туришда энг муҳим ҳудуд деб билади.