Ямал 18 ёшга тўлганда "Барса"нинг энг кўп маош олувчи футболчисига айланмоқчи

Ламин Ямалнинг манфаатларини ҳимоя қилувчи агентлик "Барселона"дан уни жамоанинг энг кўп маош олувчи футболчисига айлантиришни талаб қилмоқда, деб хабар беради Виктор Наварро.

Уларнинг фикрига кўра, 17 ёшли вингер ҳужумда энг яхшисидир, у кўплаб имкониятлар яратади. Шунингдек, футболчи клубга энг катта тижорат фойдани келтиради.

Ўз навбатида каталонияликлар Ямалнинг қанчалик аҳамиятли эканлини тан олишади, лекин клуб Левандовски ва де Ёнгнинг шартномалари вақтида қилинган хатоларни такрорламоқчи эмас. Ҳозирда "Барселона"да янгича мувозанатли ва барқарор маош тизими ўрнатилмоқда.

Ямал келаси мавсумдан бошлаб 10-рақамли либосни кияди. Memorabilia1899 портали хабар беришича, ушбу рақамни эгаллаб турган Фатининг қолиш-қолмаслигидан қатъи назар шундай бўлади.

Афсонавий Лионел Месси ўйнаган 10-рақамни топшириш маросими 13 июль куни — Ямал 18 ёшга тўлганда бўлиб ўтади. Шу куни футболчи "Барса" билан янги шартнома имзолайди, унинг товон пули 1 млрд евро этиб белгиланади.