Яҳё Синварнинг укаси Муҳаммад Синвар ҲАМАСга раҳбарлик қилади - WSJ

The Wall Street Journal (WSJ) нашрининг хабар беришича, ҲАМАС ҳаракатига янги раҳбар этиб Муҳаммад Синвар тайинланди. У 2024 йил октябрь ойида Исроил кучлари томонидан ўлдирилган Яҳё Синварнинг укаси ҳисобланади. WSJ маълумотларига кўра, ҲАМАСнинг Доҳадаги раҳбарияти ҳаракатни биргаликда бошқариш бўйича қарорга келган.

Муҳаммад Синвар Ғазо секторида ҲАМАСни қайта тиклаш ҳаракатлари марказида бўлиб, янги аъзоларни жалб қилишга катта эътибор қаратмоқда. 50 ёшли Муҳаммад, акаси Яҳё сингари, ёшлигидан ҲАМАС сафларига қўшилган ва ҳаракатнинг қуролли қаноти бўлмиш “Иззуддин ал-Қассам бригадаси”да фаол иштирок этган. У қуролли қанот раҳбари Муҳаммад Деиф билан яқин алоқада бўлган, гарчи Деиф ҳам 2024 йилда йўқ қилинган.

Газета Муҳаммад Синварни “Соя” деб аташини маълум қилди. Бу унинг кўпроқ парда ортида ишлаши билан боғлиқ. WSJ таъкидлаганидек, у ҳеч қачон Исроил қамоқхоналарида узоқ муддат қолмаган, шунинг учун унинг шахси ҳақида разведка камроқ маълумотга эга.

Исроил разведкаси ва армияси (IDF) Муҳаммад Синварни 2006 йилдаги исроиллик аскар Гилад Шалитнинг ўғирланишига алоқадор деб ҳисоблайди. Унинг акаси Яҳё айнан шу воқеа сабабли асирларни алмашиш жараёнида озод қилинган эди. “Биз уни топиш учун барча саъй-ҳаракатларимизни қиляпмиз”, – дейди IDF манбаси.

ҲАМАСнинг янги раҳбари Муҳаммад Синварнинг тайинланиши ҳаракатнинг келгуси стратегиясида қандай ўзгаришларга олиб келиши ҳали номаълум, аммо унинг орадан чиқиши Исроил учун янги қийинчиликларни туғдираётгани аниқ.