Хорижий дипломатлар Киевда Россия ҳаво ҳужуми содир бўлган жойга ташриф буюришди

14 май кечаси Россиянинг Киевга ҳужуми натижасида 24 киши, жумладан, уч бола ҳалок бўлди. Яна 48 киши жароҳат олди.

Бу ҳақда Украина Ташқи ишлар вазирлиги ижтимоий тармоқлардаги саҳифасда эълон қилди.

Таъкидланишича, вазирлик кўмагида Украина пойтахтининг Дарницкий туманидаги тўққиз қаватли турар-жой биносига Россия ракета зарбаси берилган жойга Украинада аккредитациядан ўтган бошқа давлатлар ва халқаро ташкилотларнинг 60 дан ортиқ дипломатик ваколатхоналари раҳбарлари учун ташриф ташкил этилди. Иштирокчилар қурбонлар хотирасига бир дақиқа сукут сақлашди.

Украина Фавқулодда вазиятлар давлат хизмати раҳбари Андрей Даник дипломатлар учун Россиянинг турар-жой биносига Х-101 ракетаси билан амалга оширган зарбаси оқибатлари бўйича брифинг ўтказди.

Хорижий дипломатларга шунингдек, 28 соатдан ортиқ давом этган қидирув-қутқарув операцияси қандай ўтказилгани кўрсатилди.

Украина ташқи ишлар вазири ўринбосари Евгений Перебийнис хорижий дипломатлар билан суҳбатда бу ҳужум Россиянинг тинч аҳолига қарши яна бир нишонга олинган ҳужуми бўлганини ва Москванинг бу қонли урушни тугатишга тайёр эмаслигини намойиш этганини таъкидлади.