Трампнинг Хитойга ташрифи якунлари бўйича Тайван энг зиддиятли масала бўлиб қолмоқда

Трампнинг Хитойга ташрифи якунлари бўйича Тайван энг зиддиятли масала бўлиб қолмоқда – АҚШ ОАВ.

The Wall Street Journal нашрининг ёзишича, Си Жинпиннинг Тайван бўйича огоҳлантириши Пекин саммитининг энг кескин нуқтасига айланди ва Трампнинг ушбу учрашувни "тарихдаги энг яхши саммит" сифатида кўрсатишга бўлган уринишларига соя солди.

Нашрнинг таъкидлашича, Вашингтон орол бўйича ўз сиёсатини ўзгартирмаслигини олдиндан билдирган, аммо Пекин Тайван мавзусини атайлаб биринчи планга олиб чиққан. Оқ уй музокаралардан сўнг расмий баёнотида Тайван ҳақида умуман тўхталмади, фақат кейинроқ Давлат котиби Марко Рубио АҚШнинг Тайван бўйича сиёсати ўзгаришсиз қолишини алоҳида таъкидлаб ўтди.

Fox News телеканали иккала томон омма олдида савдо ва иқтисодга урғу беришга ҳаракат қилаётганига қарамай, Тайван масаласи яна Вашингтон ва Пекин ўртасидаги асосий кескинлик чизиғига айланаётганини қайд этмоқда.

Телеканал, шунингдек, Сенатдаги демократлар етакчиси Чак Шумернинг муносабатини келтирди. У Трампни Хитойга қатъий жавоб бермаганликда айблади. Сенаторнинг сўзларига кўра, Си Жинпин Тайванни қўллаб-қувватлагани учун АҚШга амалда таҳдид қилган, Трамп эса "сукут сақлаган".

Bloomberg агентлигининг қўшимча қилишича, Пекин Си Жинпиннинг Тайван бўйича баёнотини музокаралар ҳали якунланмасдан туриб эълон қилиш ҳақидаги қарори ушбу сигнал нақадар жиддий эканини яна бир бор исботлайди.