АҚШ Эроннинг тинчлик таклифини расман рад этди — ОАВ

Tehran Times газетасининг ёзишича, Қўшма Штатлар Эроннинг можарони ҳал қилиш бўйича таклиф қилган 14 банддан иборат режасини расман рад этди.

Ҳужжатда дастлаб барча жабҳаларда тўлиқ ва зудлик билан сулҳ тузиш, сўнгра Эроннинг ядровий дастури бўйича муҳокамалар талаб қилинган.

Эрон ушбу режани май ойи бошида дипломатик каналлар орқали АҚШга тақдим этган эди. Агар жавоб ижобий бўлса, Теҳрон музокараларнинг иккинчи босқичини дарҳол бошлашга тайёр эди. Бироқ, Оқ уй ўзининг расмий жавобида ҳужжатдаги барча таклифларнинг қабул қилинмаслигини таъкидлади ва Эронга ядровий дастури бўйича босим ўтказишда давом этди, деб хабар беради нашр.

10 май куни Эрон АҚШ томонидан ишлаб чиқилган Яқин Шарқ тинчлик келишуви режасига жавоб берди. Wall Street Journal хабарига кўра, ўз жавобида Эрон томони ядровий иншоотларини демонтаж қилишдан бош тортган. АҚШ президенти Доналд Трамп Теҳроннинг жавобини «қабул қилиб бўлмайдиган» деб атади ва ҳарбий ҳаракатларни қайта бошлаш имкониятини кўриб чиқди.