АҚШ президентининг Хитой сафари қандай якунланди?

АҚШ президенти Дональд Трампнинг тўққиз йилдан кейинги илк Хитой сафари кескин баёнотлар ва дипломатик сигналлар билан якунланди.

Пекинда Хитой раиси Си Цзиньпин Трампни юқори даражада кутиб олди ва музокараларда Хитой АҚШ билан тенг мақомда эканини намоён қилди. Шу билан бирга, у Тайван масаласида Вашингтонни эҳтиёткор бўлишга чақириб, нотўғри қадамлар икки давлат ўртасида тўқнашувга олиб келиши мумкинлигини билдирди.

Хитой томони музокараларда геосиёсий ўзгаришлар ва Тайван мавзуси муҳокама қилинганини таъкидлаган бўлса, АҚШ томони асосий эътибор иқтисодий ҳамкорлик, нефть-газ савдоси, фентанил муаммоси ва Эрон масаласига қаратилганини билдирди.

Музокаралардан сўнг Трамп Си Цзиньпинни «буюк етакчи» деб атади ва Хитой билан муносабатлардан ижобий натижа кутаётганини айтди.

Бироқ кузатувчилар фикрича, учрашувдан аниқ келишувлар чиқмаган. Таҳлилчиларнинг баҳолашича, асосий натижа — икки йирик давлат раҳбарларининг очиқ зиддиятсиз мулоқот ўтказгани бўлди.

Трамп Пекинни тарк этгач, Си Цзиньпин Россия президенти Владимир Путин билан учрашувга тайёргарликни бошлагани ҳам халқаро майдонда эътибор марказига айланди.